തിരു ആറാട്ട് മഹോത്സവം

ഉത്സവത്തോടനുബന്ധിച്ചുള്ള ആദ്യത്തെ ചടങ്ങാണ് കൊടിക്കൂറ ഘോഷയാത്ര. കൊടിയേറ്റിനുള്ള കൊടിക്കൂറ ഭഗവാന് സമർപ്പിക്കുന്നത് മഠത്തിൽ കുടുംബാംഗങ്ങളാണ്. കൊടിയേറ്റിനുള്ള കയർ ഭഗവാന് സമർപ്പിക്കുന്നത് കോയിലാപ്പിൽ കുടുംബാംഗങ്ങളാണ്. വിശേഷാൽ കൊടിയേറ്റിനു മുൻപായി ക്ഷേത്രം മേൽശാന്തി, ദേവസ്വം മാനേജ്മെന്റ്, കരയോഗ പ്രതിനിധികൾ, കോട്ടൂർ കുടുംബാംഗങ്ങൾ, തിരുവിതാംകൂർ ദേവസ്വം ബോർഡ് എന്നിവരുടെ സാന്നിധ്യം വിളിച്ചുചോദിച്ച് ഉറപ്പുവരുത്തുന്ന ചടങ്ങാണ് ഇവിടെ നടക്കാറുള്ളത്. ഇതിനു ശേഷമാണ് ക്ഷേത്രത്തിൽ കൊടിയേറ്റ് നടത്താറുള്ളത്. ക്ഷേത്ര തന്ത്രിമുഖ്യന്റെ കാർമികത്വത്തിലാണ് കൊടിയേറ്റ് പൂജ നടക്കുന്നത്. ക്ഷേത്ര രാജാംഗണത്തിൽ നിൽക്കുന്ന ധ്വജസ്തംഭം അഥവാ സ്വർണ്ണക്കൊടിമരത്തിലാണ് കൊടിയേറ്റ് നടക്കുന്നത്.

ഭക്തജനങ്ങളുടെയും, നാലുകരക്കാരുടെയും, കോട്ടൂർ കുടുംബത്തിന്റെയും, ദേവസ്വം ബോർഡിന്റെയും സാന്നിധ്യത്തിൽ തന്ത്രി ഉത്സവത്തിനായുള്ള കൊടിയേറ്റിന് അനുമതി തേടുന്നു. “സർക്കാരും, നാലുകരക്കാരും, കോട്ടൂരും വന്നിട്ടുണ്ടോ? കൊടി കയറ്റട്ടെ, കൊടി കയറ്റട്ടെ” എന്ന് മൂന്നുതവണ ഉറക്കെ വിളിച്ചുചോദിച്ച് അനുമതി നേടി, പഞ്ചവാദ്യത്തിന്റെയും ശംഖുവിളിയുടെയും ശരണംവിളികളുടെയും അന്തരീക്ഷത്തിൽ, ഉരുൾനേർച്ചയ്ക്കായി ഈറനണിഞ്ഞ പുരുഷാരത്തെയും ഭക്തന്മാരെയും, ദീപം തെളിയിക്കുന്ന ഭക്തകളെയും, ആകാശത്തു വട്ടമിട്ട് പറക്കുന്ന കൃഷ്ണപ്പരുന്തിനെയും സാക്ഷിയാക്കി തൃക്കൊടി ഉയരുകയായി.

കൊടിയേറ്റ് കഴിഞ്ഞാൽ ക്ഷേത്രക്കുളത്തിൽ മുങ്ങി ശയനപ്രദക്ഷിണം ചെയ്യാൻ ഭക്തന്മാരുടെയും പുരുഷന്മാരുടെയും നീണ്ട നിര തന്നെ കാണാം. ഉത്സവത്തിന്റെ ഭാഗമായുള്ള കരപരിചയങ്ങളാണിവ. കന്നിമേൽ, കുരീപ്പുഴ കരക്കാർ വടക്കേ കളത്തിലിരുന്നും, ശക്തികുളങ്ങര, മീനം കരക്കാർ തെക്കേ കളത്തിലിരുന്നും കൂടിയിരുന്ന് ഉത്സവാഘോഷങ്ങളുടെ ചർച്ചകൾ നടത്തുന്നു. നൂറ്റാണ്ടുകളുടെ പഴക്കമുള്ള ഈ ആചാരം മുറതെറ്റാതെ ഇന്നും നിലനിർത്തിവരുന്നു.

ദീപാരാധനയ്ക്ക് ശേഷം ആചാരപ്രകാരം പറയെടുപ്പിന് തുടക്കം കുറിക്കുന്നത് ആനപ്പന്തിയിൽ പറ എടുത്തുകൊണ്ടാണ്. ശക്തികുളങ്ങര കണ്ടനാപിറവൂർ കുടുംബാംഗങ്ങളാണ് ആനപ്പന്തിയിൽ ആദ്യത്തെ പറ സമർപ്പിക്കുന്നത്. ആനപ്പന്തിയിൽ പറ എടുത്ത ശേഷം ശ്രീഭൂതബലിയും വിളക്കെഴുന്നള്ളത്തും നടത്തുന്നു. തുടർന്ന് എല്ലാ വർഷവും ഉത്സവപരിപാടികൾക്ക് തുടക്കം കുറിച്ചുകൊണ്ട് ആദ്യ ദിവസം ദശാബ്ദങ്ങളായി കേരളത്തിന്റെ തനത് കലാരൂപമായ കഥകളി നടത്തിവരുന്നു. കഥകളി ആസ്വദിക്കാനായി കേരളത്തിന്റെ വിവിധ ഭാഗങ്ങളിൽ നിന്നും കഥകളി പ്രേമികൾ എത്തിച്ചേരാറുണ്ട്.

ഉത്സവദിനങ്ങളിൽ ശക്തികുളങ്ങര കൊഞ്ചരി കുടുംബത്തിന്റെ സമർപ്പണമായി കുഞ്ചാച്ചമന് കൊടിയേറ്റ് ദിവസം വൈകിട്ട് രണ്ട് വാഴക്കുലയും കരിക്കും, രണ്ടാം ഉത്സവദിവസം മുതൽ രാവിലെ കവുങ്ങിൻ പാളയിൽ തീർത്ത വിശറി, കവുങ്ങിൻ പാളയിൽ തീർത്ത കുത്തുപാള, രണ്ട് വാഴക്കുല, കൂടാതെ പള്ളിവേട്ടയ്ക്കായി രണ്ട് മുള എന്നിവയും, പള്ളിവേട്ട കഴിഞ്ഞ് ആറാട്ടുദിവസം ഭഗവാനെ കണികാണാൻ ഒരു തുടിയിൽ മൂന്ന് ചക്ക, ഒരു തുടിയിൽ മൂന്ന് മാങ്ങ, ഒരു കിഴിയിൽ മൂന്ന് അടയ്ക്ക എന്നിവ എത്തിച്ചുകൊടുക്കാനുള്ള അവകാശമായി ഇത് തുടർന്നുപോരുന്നു. ഇതിന്റെ ദക്ഷിണയായി തിരുവിതാംകൂർ ദേവസ്വം ബോർഡ് ഒരു നാണയവും, കൺവെൻഷൻ ഉത്സവദിനങ്ങളിൽ രണ്ട് പടച്ചോറും, അൻപൊലിവ് ദിവസം എട്ട് പടച്ചോറും പ്രതിഫലമായി നൽകിവരുന്നു.

ക്ഷേത്രോത്സവത്തോടനുബന്ധിച്ചുള്ള നിത്യപൂജകൾക്ക് പുറമെ ദേവന് വിശേഷാൽ പൂജകളും നടത്താറുണ്ട്. സാധാരണ ദിവസങ്ങളിലെ ശീവേലിക്ക് പുറമെ രാവിലെ ശ്രീഭൂതബലി എഴുന്നള്ളത്ത് നടത്താറുണ്ട്. ശീവേലിയുടെ വിസ്തരിച്ചുള്ള പൂജാരീതിയത്രേ ശ്രീഭൂതബലി. ഉത്സവത്തോടനുബന്ധിച്ചുള്ള എല്ലാ ദിവസവും ഭക്തന്മാരുടെയും യുവാക്കളുടെയും ഉരുൾനേർച്ച ഭഗവാന് നടത്താറുണ്ട്. വാദ്യമേളങ്ങളുടെയും ദീപം തെളിയിക്കുന്ന ഭക്തകളുടെയും അകമ്പടിയോടുകൂടിയാണ് ശ്രീഭൂതബലി എഴുന്നള്ളത്ത് നടത്താറുള്ളത്. ശ്രീഭൂതബലി കഴിഞ്ഞാൽ ഭഗവാന്റെ പറയെഴുന്നള്ളത്താണ്. ഭഗവാൻ തന്റെ ഭക്തജനങ്ങളെ നേരിൽ കണ്ട് അനുഗ്രഹം ചൊരിയുകയും ഭക്തജനങ്ങളുടെ സ്നേഹാദരവ് ഏറ്റുവാങ്ങുകയും ചെയ്യുന്നു എന്നതാണ് ഇതിന്റെ സങ്കല്പം.

ഭഗവാന്റെ ചൈതന്യാംശം മാത്രമേ ക്ഷേത്രത്തിന് പുറത്തേക്ക് എഴുന്നള്ളിച്ചു കൊണ്ടുപോകാറുള്ളൂ. ആയതിനാൽ തന്നെ ഇവിടെയും ഈ സമയത്തും ക്ഷേത്രദർശനം സാധ്യമാണ്. കാലാകാലങ്ങളായി മുൻകൂട്ടി നിശ്ചയിച്ച ദേശവീഥികളിലൂടെ മാത്രമേ ഭഗവാൻ പറയെഴുന്നള്ളത്ത് നടത്താറുള്ളൂ. ആയതിനാൽ തന്നെ ഈ ദേശവീഥിയുടെ പരിധിക്ക് പുറത്തുള്ള ഭക്തജനങ്ങൾക്കും അന്യദേശക്കാർക്കും പറ സമർപ്പിക്കാനുള്ള അവസരം ദിവസേന ക്ഷേത്രത്തിൽ നിന്ന് ഭഗവാന്റെ പറയെഴുന്നള്ളത്ത് ആരംഭിക്കുമ്പോൾ ക്ഷേത്രസന്നിധിയിൽ ലഭിക്കുന്നു. ആചാരപ്രകാരം അന്നേദിവസത്തെ പറ സ്വീകരിക്കുന്ന ദേശത്തെ ഭക്തകളാണ് ശ്രീഭൂതബലി സമയത്ത് ഭഗവാന്റെ സന്നിധിയിൽ വിളക്ക് നേർച്ചയായി എടുക്കാറുള്ളത്.

പറയെഴുന്നള്ളത്ത് പുറപ്പെട്ടതിനു ശേഷം ക്ഷേത്രത്തിൽ വിധിപ്രകാരമുള്ള നിത്യപൂജകൾ നടത്തി ഉച്ചയോടുകൂടി ക്ഷേത്രം അടയ്ക്കുന്നു. തുടർന്ന് വൈകുന്നേരം അഞ്ചുമണിയോടുകൂടി ക്ഷേത്രം തുറക്കുകയും, പറ സ്വീകരിച്ചിട്ട് ക്ഷേത്രത്തിലേക്ക് മടങ്ങിവരുന്ന ഭഗവാന്റെ ചൈതന്യത്തെ സ്വീകരിക്കാനായി വാദ്യഘോഷങ്ങളുടെ അകമ്പടിയോടുകൂടി കാഴ്ചശീവേലി എഴുന്നള്ളത്ത് ആനപ്പന്തിയിൽ ആരംഭിക്കുന്നു. മടങ്ങിവരുന്ന ഭഗവാനെ സ്വീകരിച്ചതിനു ശേഷം ദീപാരാധന. പിന്നീട് ശീവേലിക്കും ശ്രീഭൂതബലിക്കും ശേഷം നട അടയ്ക്കുന്നു.

ഭക്തജനങ്ങൾ ഐശ്വര്യത്തിന്റെയും സമ്പൽസമൃദ്ധിയുടെയും പ്രതീകമായിട്ടാണ് ഭഗവാന് പറ വഴിപാട് സമർപ്പിക്കുന്നത്. ഭഗവാന്റെ അംശാവതാരമായ ആനപ്പുറത്ത് എഴുന്നള്ളി, ഭക്തജനങ്ങൾ സമർപ്പിക്കുന്ന പറ വഴിപാട് ഭഗവാൻ സ്വീകരിക്കുന്നു. നെല്ല്, അരി, അവൽ, മലർ, ശർക്കര, നാളികേരം, പുഷ്പം, മഞ്ഞൾ, പഴം, എള്ള്, നാണയം എന്നിവയാണ് പ്രധാനമായും നിറപറയായി ഭഗവാന് സമർപ്പിക്കാനുള്ളത്.

ഉത്സവത്തിന്റെ ഭാഗമായുള്ള വിശേഷാൽ പൂജകളിലൂടെയും, ആചാരകർമ്മങ്ങളിലൂടെയും ചൈതന്യപുഷ്ടി നേടി അശ്വാരൂഢനായി, രാജകീയ പ്രൗഢിയോടുകൂടിയുള്ള ഭഗവാന്റെ ചൈതന്യം ദേവന്റെ അനുജ്ഞയോടെ ഉത്സവവിഗ്രഹത്തിലേക്ക് ആവാഹിച്ച് ക്ഷേത്രമതിൽക്കെട്ടിന് പുറത്ത് എഴുന്നള്ളിക്കുന്നത് ദേവചൈതന്യം ആ ദേശമാകെ വ്യാപിക്കുന്നതിന്റെ പ്രതീകമാണ്. ദേശം മുഴുവൻ ദേവനെ സ്വീകരിക്കാൻ അണിഞ്ഞൊരുങ്ങിയിരിക്കണം. കുടുംബങ്ങളിൽ എല്ലാവരും ഒത്തുചേരണമെന്നാണ് പ്രമാണം. ദേവചൈതന്യം ദേശത്തിന്റെ അതിർത്തി വരെ എഴുന്നള്ളുന്നു.

ദേശരക്ഷയ്ക്കായി ദുഷ്ടനിഗ്രഹം നടത്തുന്ന ഭഗവാന്റെ പ്രതീകാത്മക വേട്ടയാണ് പള്ളിവേട്ട എന്ന ആചാരം. മനുഷ്യ മനസ്സുകളെ പ്രതിനിധാനം ചെയ്താൽ, പ്രാഥമിക മനസ്സിന്റെ അതിർത്തികൾക്കപ്പുറം അബോധമനസ്സിൽ കുടികൊള്ളുന്ന അസുരപ്രവണതകളെ വേട്ടയാടി നശിപ്പിക്കുന്നു എന്നും സങ്കല്പം. ആകയാൽ പള്ളിവേട്ട ദർശനം മഹാപുണ്യവും ചൈതന്യ പ്രസരണവുമായി കണക്കാക്കപ്പെടുന്നു.

പള്ളിവേട്ട ദിവസം മറ്റ് ഉത്സവദിവസങ്ങളിൽ നിന്നും വിഭിന്നമായി അഞ്ചിൽ കുറയാത്ത ഗജവീരന്മാരുടെ അകമ്പടിയോടുകൂടി പ്രൗഢഗംഭീരമായാണ് രാവിലെ പത്തുമണിക്ക് ശ്രീഭൂതബലി നടത്താറുള്ളത്.

ശക്തികുളങ്ങര കരയിലെ പറയെടുപ്പ് 1204-ാം നമ്പർ ശക്തികുളങ്ങര എൻ.എസ്.എസ് കരയോഗത്തിൽ അവസാനിച്ചു. ഭഗവാൻ ക്ഷേത്രസന്നിധിയിൽ മടങ്ങിയെത്തുമ്പോൾ പെരുമ്പറ മുഴക്കി, കേരളത്തിലെ എണ്ണം പറഞ്ഞ ഗജരാജാക്കന്മാരുടെ അകമ്പടിയിൽ, ഗജരാജപ്പുറത്തേറി ഭഗവാന്റെ പള്ളിവേട്ട കാഴ്ചകൾ ഒരുങ്ങുകയായി. ക്ഷേത്രസന്നിധിയിൽ കിഴക്കുനോക്കി നിൽക്കുന്ന ഭഗവാനെ വണങ്ങാൻ ഭക്തജനസാഗരം ഒഴുകിയെത്തുകയായി.

കുരീപ്പുഴ, കന്നിമേൽ, മീനം കരകളുടെ എടുപ്പുകുതിരകൾ (വെള്ളപ്പുറം) പുരുഷാരം മുഴക്കി, വാദ്യമേളത്തിന്റെയും ശരണവിളികളുടെയും അകമ്പടിയോടുകൂടി ദേശീങ്ങനാടിന്റെ രാജവീഥികളെ പുളകമണിയിച്ച്, വള്ളിക്കീഴ്, പൂവൻപുഴ, കാവനാട്, ആൽത്തറമൂട് കടന്ന്, ചെള്ളിമുക്ക് വഴി ക്ഷേത്രസന്നിധിയിൽ എത്തുമ്പോൾ ശക്തികുളങ്ങര കരയുടെ എടുപ്പുകുതിര സന്നിധിക്ക് വടക്കുഭാഗത്തായി നിരത്തി വെച്ചിട്ടുണ്ടാകും.

കുതിരയെടുപ്പ് നാലുകരയിലെയും പുരുഷന്മാർ ആചാരപൂർവ്വം ചെയ്തുവരുന്ന ഭഗവദ് നേർച്ചയാണ്. എടുപ്പുകുതിരകൾ ക്ഷേത്രസന്നിധിയിൽ നിരന്നുനിൽക്കുന്ന കാഴ്ച ഭക്തജനങ്ങളെ ആവേശത്തിന്റെ കൊടുമുടികളിൽ എത്തിക്കും. പള്ളിവേട്ട ദിവസം കുതിരയെടുത്തുവരുന്ന പുരുഷാരത്തിനും ഭക്തജനങ്ങൾക്കും ക്ഷീണമകറ്റാൻ ക്ഷേത്രസന്നിധിയുടെ തെക്കുപടിഞ്ഞാറേ കോണിലായി തനിമയാർന്ന ഔഷധപാനീയം — പശുവിൻ പാലിൽ കടഞ്ഞെടുത്ത, ഔഷധമിശ്രിതങ്ങളുടെ പ്രത്യേക കൂട്ടാൽ തയ്യാറാക്കിയ സംഭാരം — ശക്തികുളങ്ങര കരയിലെ ആവിയിൽ കുടുംബം ആചാരപരമായി നൽകി വരുന്നു.

യഥാക്രമം കുരീപ്പുഴ, കന്നിമേൽ, മീനം കരകളുടെ കുതിരയും, ഭഗവാനോട് അകമ്പടി സേവിച്ച് ശക്തികുളങ്ങര കരയുടെ കുതിരയും നാലമ്പലത്തിൽ ഭഗവാനോടൊപ്പം മൂന്നു തവണ വലംവെക്കുകയായി. തുടർന്ന് ദീപാരാധനയും, വെടിക്കെട്ടും, കാഴ്ചശീവേലിയും നടക്കുന്നു.

ആൽത്തറമൂട്ടിൽ എത്തി ആൽത്തറയിൽ പ്രതീകാത്മക വേട്ട നടത്തി ഭഗവാൻ തിരികെ വാദ്യമേളങ്ങളുടെയും, ദീപം തെളിയിക്കുന്ന ഭക്തകളുടെയും അകമ്പടിയോടെ തിരിച്ച് ക്ഷേത്രത്തിൽ എത്തിച്ചേരും. പള്ളിവേട്ടയിൽ ഭഗവാന്റെ പ്രതിരൂപമായി അമ്പെയ്യുന്നത് പക്കായിൽ കുടുംബത്തിന്റെ പ്രതിനിധിയാണ്. ഇത് അന്നുതൊട്ടേയുള്ള ആചാരമനുസരിച്ച് തുടർന്നുപോരുന്നു. പള്ളിവേട്ടത്തറയിൽ പള്ളിവേട്ടയ്ക്ക് ശേഷം വിളക്കിരിപ്പും, നാദസ്വരക്കച്ചേരിയും, വെടിക്കെട്ടും പവിത്രമായി നടന്നുവരുന്നു.

പള്ളിവേട്ട കഴിഞ്ഞ് ക്ഷേത്രത്തിൽ എത്തിച്ചേരുന്ന ഭഗവാനെ പ്രത്യേകം തയ്യാറാക്കിയ പീഠത്തിൽ ശ്രീകോവിലിന് പുറത്തായാണ് പള്ളിയുറക്കം. പള്ളിവേട്ട കഴിഞ്ഞു വരുന്ന ദേവൻ വിശ്രമാർത്ഥം ഉറങ്ങുന്നു എന്ന സങ്കല്പത്തേക്കാൾ സത്യത്തോട് അടുത്തത്, ക്ഷേത്രം ആകുന്ന യോഗീശ്വരൻ സമാധി പൂകുന്നു എന്നതാണ്. ക്ഷേത്ര ദേവന്റെ ഗുരുനാഥനായ തന്ത്രി അവിടെ ഉറങ്ങാതെ ഭഗവാനെ സർവ്വാത്മനാ സംരക്ഷിക്കുന്നു.

കുഞ്ചാച്ചമന്റെ പള്ളിവേട്ടയുടെ പിറ്റേദിവസം, പള്ളിവേട്ടത്തറയുടെ പരിസരത്തായി പക്ഷിമൃഗാദികളുടെ ജഡാവശിഷ്ടങ്ങൾ കാണുവരുന്നു എന്നത് ഇന്നും അത്ഭുതകരമായ ഒരു വിശ്വാസമായി തുടരുന്നു.